ஒன்ஸ்மோர்’ திரை விமர்சனம் ரேட்டிங் 3.4/5

‘ஒன்ஸ்மோர்’ திரை விமர்சனம்

காதல் தோல்வியால் விரக்தியில் வாழும் அர்ஜுன் தாஸை, அதிதி சங்கர் காதலிக்கிறார். முதலில் காதலை ஏற்க மறுக்கும் அவர், அதிதியின் தொடர் முயற்சியால் மனம் மாறி காதலிக்கத் தொடங்குகிறார்.

திருமண ஏற்பாடுகள் நடக்கும் நிலையில், எட்டு ஆண்டுகளுக்குப் பிறகு முன்னாள் காதலி சோனா ஒலிக்கல் தொடர்பு கொண்டு சந்திக்க அழைக்கிறார். அதன்பிறகு அர்ஜுனின் வாழ்க்கையில் ஏற்படும் மாற்றங்களே படத்தின் கதை.

அர்ஜுன் தாஸ் வழக்கமான இறுக்கமான முகபாவனையுடன் கதாபாத்திரத்திற்கு ஏற்ற சோகத்தை வெளிப்படுத்தியிருக்கிறார். அதிதி சங்கரின் துடிப்பான நடிப்பும், இயல்பான உடல்மொழியும் படத்திற்கு பலம் சேர்க்கின்றன. சோனா ஒலிக்கலின் கதாபாத்திரத்திற்கு அழுத்தமான பின்னணி இல்லாதது பலவீனம்.

ஹேஷாம் அப்துல் வஹாபின் பாடல்களும் பின்னணி இசையும் படத்திற்கு ஆறுதல் அளிக்கின்றன. அரவிந்த் விஸ்வநாதனின் ஒளிப்பதிவு எளிமையாக இருந்தாலும், படத்தின் ஒட்டுமொத்த காட்சியமைப்பு சற்று பொலிவின்றி உள்ளது.

பழக்கமான காதல் கதையாக இருந்தாலும், அதை உணர்வுப்பூர்வமாகவும் சுவாரஸ்யமாகவும் சொல்ல இயக்குநர் விக்னேஷ் ஸ்ரீகாந்த் தவறியிருக்கிறார். முதல் பாதியில் அதிதி சங்கரின் துடிப்பான நடிப்பால் ஓரளவு சுவாரஸ்யமாக நகரும் படம், இரண்டாம் பாதியில் வேகம் குறைந்து சோர்வடையச் செய்கிறது.